Рөстәм Миңнеханов Питрәч районында булды: «Сезнең үсеш потенциалы зур»
11.05.2026 05:07Татарстан Рәисе Рөстәм Миңнеханов Питрәч районына эш сәфәре белән булды. Аны Татарстан Республикасы вице-премьеры – авыл хуҗалыгы һәм азык-төлек министры Марат Җәббаров һәм Питрәч районы башлыгы Рәис Сөләйманов озата йөрде. Сәфәр барышында республика Рәисе язгы кыр эшләренең барышы белән танышты. Бу хакта ТР Рәисе Матбугат хезмәте хәбәр итте.
Хуҗалыклар җитәкчеләре белән очрашуда район башлыгы хәбәр иткәнчә, бүгенге көнгә планлаштырылган 32,5 мең мәйданның 23,5%ы чәчелгән. Кырларда һәркөнне 140 кеше эшли, 86 берәмлек техника эшли. Чәчүне 24 майга тәмамлау планлаштырыла.
Район башлыгы шулай ук сөт буенча да яхшы динамиканы билгеләп үтте – узган елга карата 103%. Шул ук вакытта шәхси ярдәмче хуҗалыкларны активрак үстерергә кирәк.
Республика авыл хуҗалыгы һәм азык-төлек министры әйтүенчә, Питрәч аграрийларына программаларда активрак катнашырга кирәк. Ул билгеләп үткәнчә, катлаулы вакытларга карамастан, республика Рәисе авылга ярдәм итү программаларын саклап калган һәм моннан дөрес файдаланырга кирәк.
Рөстәм Миңнеханов барысын да узган Җиңү көне белән котлады һәм ветераннарга бәйрәм көннәрендә генә түгел, көндәлек тормышта да ярдәм итүнең мөһимлегенә игътибар итте.
Район үсешенә килгәндә, Татарстан Рәисе кече һәм урта бизнес өлешенә игътибар итте. Бүген бу – 35%. їСезнең өстенлегегез бик зур. Сез – шәһәр яны районы, бу мөмкинлекләрне файдаланырга кирәк. Районның үсеш потенциалы зур», – дип ассызыклады ул.
Шул ук вакытта Рөстәм Миңнеханов торак секторын төзү мәсьәләсенә игътибар белән карарга, планлаштырганда барлык кирәкле социаль инфраструктураны исәпкә алырга кирәклеген билгеләп үтте.
Моннан тыш, республика Рәисенә «Росагролизинг» АҖнең машина-трактор комплексын төзү проектын тәкъдир иттеләр. Үзәк аграрийларны һәм республиканың юл-коммуналь хуҗалыгы предприятиеләрен югары технологияле техниканы турыдан-туры сатып алмыйча гына файдалану мөмкинлеге белән тәэмин итәр дип көтелә.
Эре агрохаб төзүне ике этапта уздырырга планлаштыралар. Склад биналары, күргәзмә мәйданчыклары, уку класслары төзү, техникага теркәлү гамәлләрен рәсмиләштерү һәм B, C, E, F категорияле тракторчы-машинист таныклыклары бирү өчен Дәүләт техника күзәтчелеге бүлеген ачу күздә тотыла. Шулай ук агросервис хезмәтләре күрсәтү өчен авыл хуҗалыгы техникасы һәм автотранспорт сатып алу да планлаштырыла.
Сүз уңаеннан, хәзерге вакытта «Нәтиҗәле конкурентлыкка сәләтле икътисад» илкүләм проекты гамәлгә ашырыла.