Татарстан Рәисе Россия Генераль Прокуратурасының панель дискуссиясендә катнашты

Рөстәм Миңнеханов билгеләп үткәнчә, Татарстанда инвестицияләр җәлеп итүнең комплекслы системасы төзелгән, ул өч принципка нигезләнә: тотрыклылык, инфраструктура һәм кадрлар потенциалы. «Инвестор беренче чиратта иминлек гарантияләрен һәм законның өстенлеген, квалификацияле кадрлар һәм кирәкле инфраструктура булуны бәяли. Әлеге база шартларыннан башка җитди капитал килүгә исәп-хисап тотып булмый», – диде республика Рәисе.

Ул ассызыклаганча, республика эре сәнәгать төбәге статусына таянып, импортны алыштыруга стратегик юнәлеш алды. Дөньякүләм дәрәҗәдәге мәйданчыклардан торган ике махсус икътисадый зонаның уңышлы эшләве сайланган курсның нәтиҗәлелеген раслый.

«Республикада эшлекле климатны камилләштерү буенча зур эш алып барыла. Биредә төп юнәлешләр булып эшкуарларның хокукларын яклау, хокукый гарантияләрне ныгыту һәм бизнес алып бару мөмкинлекләрен киңәйтү тора. Прокуратура органнары һәм контроль-күзәтчелек структуралары белән тыгыз хезмәттәшлек нәтиҗәсендә без бизнеска административ басымны сизелерлек киметүгә ирештек», – диде Рөстәм Миңнеханов.

Республика Рәисе аерым билгеләп үткәнчә, инвестиция процесслары даими контроль таләп итә. «Инвестпроектларны уңышлы гамәлгә ашыру детальләргә игътибар итмичә мөмкин түгел. Инвесторны җәлеп итү генә җитми — аңа проектны гамәлгә ашыруның барлык этапларында да ярдәм күрсәтергә кирәк», – диде Рөстәм Миңнеханов.

Сүз уңаеннан, хәзерге вакытта Татарстанда «Нәтиҗәле конкурентлыкка сәләтле икътисад» илкүләм проекты гамәлгә ашырыла.