Қарағанды облысының полицейлері “АрселорМитталТеміртау” АҚ заңгерінің өліміне қатысты күдіктілерді ұстады
26.04.2023 18:05| Күдіктілер екі адам. |
Қарағанды облысының полицейлері «АрселорМитталТеміртау» АҚ заңгерінің өліміне қатысты күдіктілерді ұстады, деп хабарлайды Caravan.kz медиа порталы Рolisia.kz-ке сілтеме жасап.
«Жүргізілген жедел-тергеу іс-шараларының нәтижесінде Шахтинск қаласының 53 жастағы тұрғынының өліміне қатысы бар деген күдікпен аталған қаланың тұрғындары – 52 жастағы ер адам мен 44 жастағы әйел анықталып, ұсталды.
Қылмыстық оқиға жәбірленушінің кәсіби қызметімен байланысты емес. Айғақзаттар тәркіленді. Қазіргі уақытта тиісті сараптамалар тағайындалды», — деп хабарлады Қарағанды облысы Полиция департаментінің бастығы Ерлан Файзуллин.
Еске салсақ, 23 сәуір күні Шахтинск қаласында пәтердегі өртті сөндіру кезінде денесінде зорлық-зомбылық белгілері бар 53 жастағы пәтер иесінің мәйіті табылған болатын.
Аталған дерекке байланысты Қазақстан Республикасы Қылмыстық кодексінің 99-бабына («Адам өлтіру») сәйкес тергеу жүріп жатыр.