Татарстанда 17 меңнән артык пенсионерны хастаханәләргә бушлай илткәннәр
21.05.2026 12:36Татарстан республикасында өлкән яшьтәге авыл халкын медицина учреждениеләренә илтү программасы дәвам итә.
Ел башыннан район хастаханәләренә 17 меңнән артык пенсионер озатылган.
Татарстан Республикасы Хезмәт, халыкны эш белән тәэмин итү һәм социаль яклау министрлыгы мәгълүматларына караганда, быел медицина учреждениеләренә барлыгы 17 174 өлкән кеше китерелгән. Шуларның 14 430ы диспансеризация узган.
Пенсионерларны район хастаханәләренә махсус җиһазландырылган транспорт белән алып баралар. Автомобильләр «Гаилә» милли проекты кысаларында федераль бюджет хисабына сатып алынган.
Өлкән кешеләр сәфәр вакытында ялгыз калмый — аларны социаль хезмәт күрсәтү үзәкләре белгечләре озатып йөри.
Программа өлкән буын вәкилләренең сәламәтлеген саклауга һәм тормыш сыйфатын яхшыртуга юнәлдерелгән. Табиблар сүзләренчә, даими медицина тикшерүләре авыруларны иртә ачыкларга һәм вакытында дәвалау башларга ярдәм итә.
2019 елдан бирле республика буенча 371 меңнән артык кеше медицина учреждениеләренә илтеп җиткерелгән. 2026 елда исә 35 меңнән артык татарстанлыны әлеге программа белән колачлау планлаштырыла.