Ленар Яшен: «Сәхнәгә кайту теләген миндә Фирдүс Тямаев уятты»

Ленар, өйләнгәнче, кызлардан бик күп игътибар бар, дип сөйләгәнсез. Хәзер «фанатка»ларыгыз тындымы соң?

Хәзер бөтенебез картаеп беттек ич инде. Күбебезнең яраткан хатыннары/ирләре бар. 18 яшьлек чаклар артта калды. Алар тынмасалар, хатын миңа «тондырырга» мөмкин (көлә).

Сезгә хыянәт иткәннәре булдымы?

Булды, мин белгәне 1 кеше, калганын белмим.

Кыз өчен берәр «безумный» гамәл кылганыгыз бармы?

Бар инде, әлбәттә, үзем дә «безумный» кеше бит мин.

Күп кызлар арасыннан хатыныгызны ничек сайлап алдыгыз? Ул сезгә кайсы яклары белән ошады?

Үз кешең икәне бер күрүдән үк аңлашыла инде ул. Иң мөһиме — ул кешедә дә нәкъ шундый ук уйлар булырга тиеш.

Ләйсәннең сабырлыгы, тынычлыгы, оялчанлыгы, бик гади булуы ошады. Ул – бик ихлас кеше. Кайвакыт аңардан көтмәгән сүзләр ишетергә була. Кеше уйласа да, әйтмәс булган сүзләрне Ләйсән әйтә дә бирә. Ул икейөзлелекнең нәрсә икәнен белми. Аның юмор хисе дә әйбәт, минем барлык шаяртуларымны аңлый, шуңа бик күңелле яшибез, Аллаһка шөкер.

«Ай-яй нинди килен» җыры аңа багышланганмы?

Юк ла инде… Әллә кайчангы жыр бит инде ул. Ә менә соңгы 3-4 елда язган бөтен җырлар аңа багышлангандыр.

Хатыныгызны шигырьләр язарга өйрәтәм, дигән булгансыз. Килеп чыгамы соң?

Хатыннан мин нәрсә генә эшләтеп карамадым инде (көлә). Пушок кушаматлы песи, эт турында да язды, китап чыгарып тормаска булдык. Фотодизайнга да өйрәнеп карады, хәзер миңа блогерлыкта видеоларны монтажларга ярдәм итә.

«7 ел элек сәхнәдән киттем»

Җырлап кына яшисезме?

Мин 7 ел элек сәхнәдән киттем, композиторлык, продюсерлык белән шөгыльләнә башладым. Үземне сыйфатлы җырлар язу өлкәсендә үстердем. Хәзер остаргач, шомаргач кире үземне сәхнәгә кайтару өстендә эшлим.

Сезнең озак вакытка сәхнәдән китүегез нәрсә белән бәйле?

Русчалап әйткәндә, мин «уперься в потолок». Үсеш тукталды, тагын да яхшырак җырлар язарга тәҗрибәм җитми иде. Бу өлкәдә үземне үстерү өчен, студия тормышына киттем. Җиде ел элек сәхнәдән киткәч, үземә «беренче номерлы» татар җырчылары җырларымны ала башлагач, бөек композитор булгач, йә сәхнәгә кире кайтачакмын, йә берәр кешене «продюссировать» итәрмен, дигән идём. Нәтиҗәсен күрәсездер. Фирдүс Тямаевка ике хит язып, бөтенесен үзем эшләп бирдем. Бу – «Күлмәгең матур икән» һәм «Сагындым иреннәреңне» җырлары. Хәзер әкренләп сәхнәгә үзем дә кайта башладым. Социаль челтәрләрдә янәдән барлыкка килдем. Кешегә ошый. Үсеш тә бар.

Социаль челтәрегездә бер постта «эчүне дә ташладым» дигәнсез… Алда галәмәт «капкалый» идегезме?

Әлбәттә, иҗат кешесе бит мин (көлә). Биш елдан артты инде, исен дә иснәгән юк.

«Бүтән булмыйм гашыйк», «Күзләр яна», «Пупсигым» җырлары заманында бик популяр иде, нигә шул юнәлештә җырлар иҗат итүне дәвам итмисез? Хәзер җырларыгыз бик сирәк чыга..

Җырлар бөтенләй чыкмый иде инде, хәзер чыга башлаячак, Аллаһ боерса.

Сезне музыкаль мәйданнарда югалтучылар шактыймы? «Кайчан җырлар чыгарасыз?» – дип язалармы?

Сәхнәдән китәм дигәндә, мин кемгә кирәк, мине кем тыңлый инде, дип уйлый идём. Сәхнәдән киткәч һәм хәзер кире кайта башлагач, мине хәйран кеше тыңлаган икәнен аңладым. Миннән әле дә җырлар көтәләр икәнен белгәч – шаккаттым.

«Бүтән булмыйм гашыйк» җырыннан соң, гыйшык хисен озак кичерми тордыгызмы?

У-у-у, шунда ук гашыйк булдым…Шуннан соң бүтән тагын гашыйк булмыйм, дип йөрдем. «Круговорот» булды бу (көлә).

«Опа, нинди кыз бала» җырын тыңлап, сезгә матур, озын аяклы кызлар ошый, дигән нәтиҗә ясап була, шулаймы?

Аяклар мөһим мени соң хәзер… Ул вакытта шулай булгандыр инде, күрәсең.

«Читтән караганда, бөтен нәрсә дә җиңел күренә инде ул»

Сез аранжировщик та, мәҗлесләр дә алып барасыз. Барысына да өлгереп буламы?

Мин 100% иҗат кешесе, иҗатта яшим. Шигырьләр, көйләр язам, аранжировкалар эшлим, бәйрәмнәр дә алып барам. Рәхәт бит ул. Бабай әйтмешли, эшли алганда рәхәт инде ул. Менә ул хәзер картайды, һаман эшлисе килсә дә, булдыра алмый инде. Шуңа яшь вакытта бер минутны да әрәм итмичә эшләп калырга кирәк. Нәтиҗәсе була аның.

Фирдүс Тямаев, Рифат Зарипов ише танылган җырчылар белән эшләгәч, танылу җиңелрәктер?

Читтән караганда, бөтен нәрсә дә җиңел күренә инде ул. Гомумән, Фирдүс Тямаевка рәхмәтлемен, ул миңа ышанды. Янәдән сәхнәгә кайту теләген да миндә ул уятты. Бик көчле терәк ул. Менә дигән кеше!

Тагын нинди «топовый» җырчылар белән эшлисез? Кемнәр белән эшләргә теләр идегез?

Элегрәк бу сорауны биргән булсагыз, санап киткән булыр идём. Ләкин хәзер минем максатым башка, бу – Ленар Яшеннең иҗатын янәдән күтәрү.

Җырчылар «Хәзер җырга аранжировка яздыру бик кыйммәт», – диләр, сездә бәяләр ничек, калганнарныкыннан күпкә аерыламы?

Тормышта гел шулай инде ул – сатучыга арзан, алучыга кыйбат… Миндә бик кыйммәт бәяләр димәс идём.

Хәзер бу өлкәдә эшләүчеләр дә күп бит, конкуренция да көчледер?

Конкуренциянең барлыгын-юклыгын бу җырларны тыңлаучылар саны гына күрсәтә. Әгәр син эшләгән «продукт»ны яратып тыңлыйлар икән, димәк, конкуренция юк.

Күпкырлы, «универсаль» кеше булгач, акча ягыннан мохтаҗлык гомумән юктыр?

Ир кешегә бу сорауны ишетергә сәер. Ир-ат көне-төне эшләргә тиеш. Әйтәм бит, нәтиҗәсе була аның. Бүген булмаса – иртәгә, иртәгә булмаса – берсе көнгә.

Сезнең гаиләгә бер айга якынча ничә сум акча кирәк?

Күп түгел. Алай санап барган да юк, «шырым-бырым»га акча тотмыйбыз. Ләйсән дә, мин дә акча туздыра торган кешеләрдән түгел.

Ярдәм йөзеннән, кемгәдер бушка аранжировка эшләп биргәнегез бармы?

Бар, әлбәттә.

Керем китерә торган башка эшегез бармы, яисә сез тулысынча иҗат белән генә шөгыльләнәсезме?

Иҗат белән генә шөгыльләнәм.

Иҗат белән әле яңа гына шөгыльләнә башлаучылар сездән ярдәм сораса, булышасызмы?

Әлбәттә. Ләкин күргәнемчә, синең киңәшләрең беркемгә кирәк тә түгел. Кеше барыбер үзенчә эшли, һәм ничек дөрес икәнлеген хаталангач кына аңлый.

Яшь җырчыларга нинди киңәшләр бирер идегез?

Баналь киңәшләр – көне-төне эшләргә, үзеңә ышанырга һәм беркайчан да беркемнең дә сүзенә карамаска.

Рәхмәт. Уңышлар сезгә!